Прыйшла вясна, а значыць, самы час прыводзіць у парадак нашы двары, паркі, вуліцы, высаджваць дрэўцы і кусты. Карэспандэнты «Р» паглядзелі, як рыхтуюцца да новага сезона нашы камунальнікі. Пашкоджаныя пасля зімоўкі арэлі, каруселі і атракцыёны альбо старанна рамантуюцца, альбо ўтылізуюцца. Бо ад нармальнага функцыянавання такiх агрэгатаў залежыць бяспека многiх людзей. Давайце паглядзім, як спецыялісты ўстараняюць хібы.
![](/upload/iblock/e8c/e8c5f06be280a6682891764e3d2a4c43.jpg)
Зламаныя сядзенні арэляў, каруселяў, карозія металу горак і разбітыя вуглы пясочніц — на дзіцячых пляцоўках пасля зімы неабходна наводзіць парадак. Каб ніякія траўмы не азмрочвалі гульні малых, да 1 мая работнікі ЖКГ прывядуць усе мінскія двары ў належны стан. Карэспандэнт «Р» выйшла разам са спецыялістамі ЖЭУ № 6 Заводскага раёна на рэгулярны агляд гульнявога абсталявання і даведалася, куды звяртацца, калі каруселі ў двары здаюцца небяспечнымі.
У дварах мікрараёна Чыжоўка кіпіць праца. Работнікі ЖЭУ старанна фарбуюць арэлі, рамантуюць горкі, напаўняюць пяском пясочніцы. Карацей, робяць усё, каб дзецям, якія зусім хутка выйдуць гуляць у двары, было весела, а бацькам — спакойна за бяспеку сваіх малых.
— У першую чаргу мы клапоцімся пра тое, каб ні адзін атракцыён не быў траўманебяспечным. Правяраем сядзенні арэляў, калі трэба, мяняем іх. Вось, напрыклад, як тут, — звяртае ўвагу на недахоп галоўны інжынер ДП «ЖЭУ № 6 Заводскага раёна» Мікалай Буката. — Калі ж за зіму прыходзіць у непрыдатнасць нейкі апорны элемент арэляў, то мы не маем права яго рамантаваць — у такім выпадку зносім іх і ўсталёўваем новы атракцыён. У драўляных пясочніцах аднаўляем і замяняем дошкі, каб нідзе не было вострых небяспечных вуглоў. Акрамя натуральнага зносу абсталявання, падчас аглядаў дзіцячых пляцовак мы знаходзім і наступствы актаў вандалізму. Праўда, зараз такія праблемы сустракаюцца ўжо радзей.
![](/upload/iblock/de5/de525c1ba46d9f10857a112cb1ad5d4a.jpg)
Візуальны кантроль эксплуатацыйныя арганізацыі праводзяць штодзень, каб выявіць, напрыклад, наступствы неспрыяльных умоў надвор’я. Кантроль функцыянавання праводзіцца адзін раз у 1—3 месяцы з мэтай праверкі трываласці і ўстойлівасці абсталявання, у тым ліку яго зносу. Штогод работнікі ЖКГ ажыццяўляюць кантроль для пацвярджэння нармальнага эксплуатацыйнага стану, уключаючы фундаменты і паверхні. Акрамя таго, у выпадку неабходнасці арганізоўваюць пазачарговыя агляды. Калі ёсць сур’ёзныя няспраўнасці, якія ўплываюць на бяспеку абсталявання, іх стараюцца ліквідаваць неадкладна. У выпадку калі адрамантаваць немагчыма, эксплуатацыя атракцыёна прыпыняецца, і яго дэманціруюць. Недахопы на дзіцячых пляцоўках, што знаходзяцца ў падпарадкаванні ЖКГ, ліквідуюць падрадчыкі, якія выйгралі тэндар на гэтую работу. На самастойным тэхнічным абслугоўванні знаходзяцца таварыствы ўласнікаў жылля — там аднаўленне абсталявання вядзецца за кошт жыхароў.
— У нас 50 працэнтаў работы ўжо выканана. Стараемся дзейнічаць хутка, усё ж такі ўжо цёпла, дзеткам хочацца бавіць час на вуліцы. У некаторых дварах за бюджэтныя сродкі ўсталёўваем і новае гульнявое абсталяванне, даўкамплектоўваем пляцоўкі. Прыслухоўваемся да пажаданняў жыхароў, калі ім чагосьці не хапае, — дадае галоўны інжынер.
Усяго раённыя КУП «ЖКГ» абслугоўваюць 4070 пляцовак, на якіх устаноўлена больш за 27 тысяч адзінак абсталявання. Зараз работы па рамонце і афарбоўцы выкананы на 1281 дзіцячай пляцоўцы, дзеліцца апошнімі лічбамі Кіра Кандрацьева, галоўны спецыяліст ГА «Мінская гарадская жыллёвая гаспадарка»:
— У кожнай жыллёвай арганізацыі прызначана службовая асоба, якая адказвае за эксплуатацыю дзіцячага гульнявога абсталявання. Аднак нават калі ўсе каруселі спраўныя, гэта не гарантуе поўную бяспеку. Асаблівая адказнасць ляжыць на бацьках, сваяках і іншых дарослых, якія суправаджаюць малых: яны павінны сачыць за паводзінамі дзяцей у час наведвання гульнявых пляцовак.
Калі ж вы выявілі няспраўнае дзіцячае гульнявое абсталяванне або яно здаецца вам небяспечным, неабходна звярнуцца ў эксплуатацыйную арганізацыю або службу 115.
matuzova@sb.by