Вучань Іўеўскай дзіцячай школымастацтваў Раман Кеўра за фартэпіянабеларускай вытворчасці.— У дзяцей ёсць магчымасць навучыцца танцаваць, маляваць, спасцігаць асновы акцёрскага майстэрства, спяваць, іграць на самых розных музычных інструментах: фартэпіяна, скрыпцы, цымбалах, гітары, домры, балалайцы, баяне, акардэоне, трубе, кларнеце і саксафоне.
Што важна, інструментаў у школе хапае ўсім жадаючым.
— Пасля таго як тэма музычных інструментаў была паднята Прэзідэнтам, ніякіх праблем з імі няма. На аднаўленне матэрыяльна-тэхнічнай базы пастаянна выдзяляюцца сродкі, — расказвае дырэктар. — Некалькі тыдняў таму набылі тэнар і трубу, летам купілі скрыпку. А ў кастрычніку атрымалі ў падарунак два піяніна беларускай «Фабрыкі фартэпіяна», створанай па даручэнні Аляксандра Лукашэнкі.
Дарэчы, з творчасцю навучэнцаў школы Аляксандр Рыгоравіч сёлета пазнаёміўся асабіста. Падчас наведвання ў жніўні Іўеўскага раёна Прэзідэнт паглядзеў фрагмент дзіцячага спектакля «Ніхто не паверыць», пастаўленага ўзорным тэатральным калектывам Іўеўскай дзіцячай школы мастацтваў.
— Аляксандр Рыгоравіч высока ацаніў нашых артыстаў і параіў паступаць адразу ў Акадэмію мастацтваў, — успамінае Іна Міхайлаўна. — Такая пахвала дарагога каштуе.
Іна Шукава з вучаніцай Ганнай Шабановіч.Для дзяцей, гаворыць дырэктар, вельмі важна выступаць на сцэне, дэманстраваць перад іншымі свае творчыя здольнасці, удзельнічаць у конкурсах, прывозіць перамогі. Усё гэта матывуе іх не кідаць заняткі і працягваць развіваць свае таленты.
— Ездзім на рэгіянальныя, абласныя, рэспубліканскія конкурсы, прымаем удзел і ў міжнародных спаборніцтвах, — працягвае Іна Шукава. — Вельмі папулярныя сёння інтэрнэт-конкурсы. Здымаем на відэа фрагмент спектакля, танец або інструментальнае выступленне і адпраўляем арганізатарам. Гэта зручна, бо не ўсе маюць магчымасць выехаць, напрыклад, за мяжу. А атрымаць дыплом лаўрэата міжнароднага конкурсу вельмі прэстыжна.
Ладзіць спаборніцтвы рэгіянальнага ўзроўню і Іўеўская дзіцячая школа мастацтваў. З 2010 года кожнай вясной на яе базе праходзіць конкурс дзіцячай творчасці «Вясновыя фантазіі». А ў мінулую суботу тут упершыню прайшоў фестываль-конкурс «Хрустальная сняжынка». Удзел у ім прынялі больш за 170 навучэнцаў дзіцячых школ мастацтваў з усёй Гродзенскай вобласці.
— Хацелася напярэдадні навагодніх свят прынесці радасць тым, хто цікавіцца і займаецца мастацтвам, даць магчымасць дзецям выступіць на сцэне, зарадзіцца новымі эмоцыямі, — тлумачыць ідэю «Хрустальнай сняжынкі» дырэктар. — Спадзяёмся, конкурс стане традыцыйным.
Большасць дзяцей займаюцца ў школе дзеля агульнага развіцця. Але частка выпускнікоў абавязкова працягвае адукацыю ў прафесійных навучальных установах, гаворыць Іна Міхайлаўна:
— Адзін год быў асабліва «ўраджайным» — 25 працэнтаў нашых выпускнікоў вырашылі ператварыць сваё захапленне ў прафесію. У асноўным паступаюць у Ліду і Гродна. Калі маем вострую патрэбу ў якім-небудзь выкладчыку, даём выпускнікам накіраванне — ведаем, што вернуцца да нас. Дарэчы, выкладчыцкі калектыў школы ў асноўным і складаецца з нашых былых вучняў.
Сама Іна Шукава таксама выпускнік Іўеўскай дзіцячай школы мастацтваў (тады яшчэ музычнай школы). Скончыла Лідскае музычнае вучылішча і вярнулася ў сваю школу. Дваццаць гадоў працавала настаўнікам ігры на скрыпцы, апошнія дванаццаць — дырэктар. Па слядах маці пайшлі і дзеці Іны Міхайлаўны. Дачка Анастасія скончыла музычна-тэарэтычнае аддзяленне, да дэкрэтнага адпачынку выкладала сальфеджыа і музычную літаратуру. Сын Антон працягвае вучыцца на піяніста ў Гродне.
Назіраючы за пераемнасцю традыцый у Іўеўскай дзіцячай школе мастацтваў, складваецца ўражанне, што вучні тут будуць заўсёды. Нягледзячы на з'яўленне новых тэхналогій і захапленняў, класічныя віды мастацтва ў іўеўскіх жыхароў, як і раней, у модзе.
mila@sb.by
