![](https://storage01.sb.by/iblock/d72/d72ddcdb7ce430c07bc8fc4df67e0df6/48e2229bbd59f20c39e82c9d538f04af.jpg)
У гэтыя дні людзі будуць вітаць адзін аднаго словамі: «Хрыстос уваскрос — Сапраўды ўваскрос!» Гэта прывітанне азначае веру ў тое, што Месія перамог смерць і можа дапамагчы ў гэтым нам.
Апосталы і першыя хрысціяне былі абсалютна ўпэўнены ва Уваскрасенні Езуса. Вялікдзень з’яўляецца пацверджаннем таго, што і мы можам уваскрэснуць у канцы часоў. Уваскрослы Хрыстос запрашае нас духоўна ажыць: мы не павінны ляжаць пахаванымі ў магіле нашых грахоў, шкодных звычак, небяспечных залежнасцяў, адчаю, расчаравання або сумневаў. Замест гэтага чакаецца, што мы будзем жыць радасным і мірным жыццём, пастаянна адчуваючы жывую прысутнасць Уваскрослага Месіі, які любіць нас ва ўсіх падзеях нашага штодзённага жыцця, нават сярод суму, пакут, болю і напружанасці.
Нагадванне сабе пра рэальную прысутнасць Уваскрослага Хрыста дазваляе нам весці дысцыплінаванае хрысціянскае жыццё. Гэта дапамагае нам кантраляваць свае думкі, жаданні, словы, паводзіны і дзеянні. Збаўчае ўсведамленне прысутнасці ўваскрослага Хрыста натхняе нас шанаваць сваё цела, захоўваючы яго святым, чыстым і свабодным ад шкодных звычак і залежнасцей.
У нашым асяроддзі заўсёды знойдуцца прыклады людзей, якія змаглі кардынальна змяніць сваё жыццё на лепшае, нават калі ў гэта ўжо ніхто не верыў. А можа прыйшоў час і нам змяніць так сваё жыццё?..
Уваскрослы Месія прысутнічае ў нашых бліжніх і ва ўсіх, каго мы сустракаем. Таму варта паважаць іх і служыць ім з любоўю і бескарыслівасцю. Мы запрошаны стаць сапраўднымі хрысціянамі, выпраменьваючы вакол сябе Уваскрослага Хрыста ў выглядзе бескарыслівай і ахвярнай любові, міласэрнасці, спагады і духу пакорнага служэння.
Ксёндз Кірыл БАРДОНАЎ