Раскажу гісторыю, якой бы не ведала, каб не выдаўся момант першы раз за доўгі час зазірнуць на хвілінку ў чат вёскі, дзе жыву. Суседзі там распачалі сварку. Адзін сусед западозрыў іншага ў тым, што той, маўляў, выкарыстоўвае электрычнасць міма лічыльніка. «Дык вось чаму ў яго, уладальніка двухпавярховага катэджа, ніколі нават у халады з печкавай трубы дыму не відаць!» — упіваўся сваёй знаходлівасцю руплівец. І потым нават ліст у электрасеткі аб уласных здагадках напісаў. А пакуль чакаў, калі спецыялісты прыедуць з праверкай, вырашыў самавольна пракантраляваць, ці праўда, што сусед чымсьці абагравае дом, не распальваючы ні печ, ні кацёл.
Дазволу ў гаспадароў дома не спытаў і познім вечарам павесіў на плоце суседа цеплавізар. Пасля нядоўгіх назіранняў, падазрэнні атрымалі яшчэ большую моц: аказалася, сцены дома суседа свяціліся чырвоным, а значыць, дом ацяпляецца. «Ясная справа, выкарыстоўвае інфрачырвоныя абагравальнікі, а кілаваты элелектраэнергіі ідуць міма лічыльніка! Вось таму ў жыхароў паловы вёскі і святло часта знікае!» — зрабіў выснову мужчына.
Гэтая карціна несяброўскіх адносін аднаго суседа да другога здзівіла і ўсхвалявала адначасова. Руплівец за правільнае выкарыстанне электраэнергіі, відавочна, сам нешта з суседам не падзяліў, а вось зараз і падазрае. Відавочна: прапальваць печкі можна і ў той час, калі нікому не відна (асабліва калі ў вёсцы ўзімку жыве толькі больш за дзесяць жыхароў). Ды і вясковыя людзі ведаюць: калі пры моцным марозе тапіць бярозавымі дровамі, дымок настолькі шызы і цягнецца тонкім струменьчыкам, што ў паветры яго можна і не заўважыць.
Праверка з электрасетак, вядома, прыехала. У таго, каго хацелі абвясціць парушальнікам, аказаліся спраўнымі аж тры печкі з ляжанкамі. Ды і лічыльнік быў вынесены за плот, каб правяраючыя маглі без перашкод правесці праверку. Як тут скрыеш растрачаную электраэнергію?
Сітуацыя заставіла задумацца: чаму той, хто зладзіў гэтую каніцель, пасля праверак не папрасіў прабачэння ні ў суседа, ні ў работнікаў электрасетак? Сюжэт з сельскага жыцця распавядае вось аб чым: той, хто больш за ўсіх казаў пра недахопы іншых, за падазрэннямі хаваў уласныя шкілеты ў шафе. Выявілася, што менавіта ён сам закон і парушае.
Дарэчы, за мінулы год персаналам філіяла «Энергазбыт» РУП «Мінскэнерга» на тэрыторыі Мінскага раёна праведзена 199 рэйдаў па выяўленні фактаў крадзяжу электрычнай энергіі. Складзена 213 актаў аб самавольным (бездагаворным) і безуліковым спажыванні, іншых парушэннях у працы сродкаў разліковага ўліку электрычнай энергіі па розных групах спажыўцоў на 1,294 мільёна кілават-гадзін.
Выплаціўшы штраф, аднавяскоўцы потым памірыліся, сышліся на тым, што суседзяў не выбіраюць. А калі ўсвядомілі памылкі, то няма чаго і крыўду трымаць адзін на аднаго. Цяпер да плота адзін аднаго падыходзяць, каб спытацца пра задроўе ды расказаць пра жыццё-быццё.
А якія жыццёвыя ўрокі вам паднеслі сітуацыі з суседзямі?
kuzmich@sb.by
