Сёлета свята пройдзе 2—3 жніўня. Ужо ў пятніцу вечарам наведвальнікам фэсту прапануюць забаўляльную праграму «Загадкавыя з’явы старога горада», экскурсію па кармеліцкім касцёле і некалькі выстаў: «Насякомыя з Кнігі рэкордаў Гінеса», «Старонкі гісторыі пажарнай службы Мсціслава», «Гульні каралёў» (пра ваенную справу сярэдневякоўя). У першы фестывальны дзень адкрые дзверы для гасцей і сярэдневяковая карчма «Табард», дзе будуць частаваць стравамі кухні «цёмных стагоддзяў».
Урачыстае адкрыццё свята з шэсцем, прадстаўленнем рыцарскіх клубаў, творчых калектываў, конна-гістарычнага клуба «Залатая шпора», выступленнем групы «Літы Талер» адбудзецца ў суботу раніцай. Пасля яго гасцей запросяць на тэрыторыю Замкавай гары, дзе пройдуць рыцарскія конныя забавы, баі пешых рыцараў, турнір лучнікаў, тактычныя бугурты, масавыя бітвы, турнір «Бітва за сцяг», паказальныя выступленні і манеўры ХVII стагоддзя, тэатралізаваны штурм замка. Тут жа на галоўнай сцэне выступяць гурты «Літы Талер» і Hardwood, адбудуцца канцэрты айчыннага фолк-рок гурта «Стары Ольса» і гурта з Украіны FRAM. Увечары чакаецца некалькі вогненных шоу і сярэдневяковая дыскатэка.
Маленькім гасцям таксама будзе чым заняцца на свяце. Для іх на тэрыторыі езуіцкага кляштара запланаваны «Сярэдневяковыя забавы» з танцамі, песнямі, конкурсамі, прызамі і займальнымі майстар-класамі.
mila@sb.by
Фота аўтара.
