![](/upload/iblock/eab/eab314b02c60b6f4b94f776cde7ed90a.jpg)
Па апошнім слове тэхнікі
![](/upload/iblock/b3c/b3cfb2c6042afb85da135e3c27c915b5.jpg)
— Калі прыняць пад увагу, што корпус здадзены яшчэ ў васьмідзясятых, становіцца зразумела, што ён не можа адпавядаць запатрабаванням сённяшняга часу, — лічыць начальнік галоўнага ўпраўлення па ахове здароўя Магілёўскага аблвыканкама Аляксандр Жылін.
Заказчыкам маштабнай рэканструкцыі выступіла УКБ Магілёўскага гарвыканкама. Генпадрадчыкам — будтрэст №17. У рабоце таксама задзейнічаны і субпадрадчыкі. У першую чаргу ў будынку замянілі ўсе камунікацыі. Па-другое, перамены закранулі ўнутранае змесціва. Новыя сучасныя аперацыйныя і рэанімацыя, палаты, абсталяванне, сістэмы сігналізацыі — умовы для мам і нованароджаных, створаныя ў перынатальным цэнтры трэцяга ўзроўню, будуць самыя лепшыя і адпавядаюць сусветным.
Урачыстае адкрыццё ультрасучаснага раддома чакаецца ўжо ў лістападзе. Зараз у ім ідзе апошняя падрыхтоўка: заканчваецца афарбоўка сцен, пачынаецца мантаж тэхнікі, расстаўляецца мэбля. Галоўная медсястра раддома Наталля Багачова тлумачыць:
— Былыя палаты, дзе адначасова знаходзілася па пяць чалавек, адышлі ў мінулае. Цяпер яны разлічаны на дзвюх маці і іх дзяцей. Па жаданні кожная з жанчын можа заняць так званы сямейны пакой: разам з парадзіхай тут маюць магчымасць застацца яе муж ці іншыя родныя. Такія палаты будуць абсталяваны не толькі зручнымі ложкамі, але і міні-кухнямі. Пры кожным пакоі свае санвузлы.
Любы капрыз
Галоўны ўрач бальніцы Павел Арахоўскі не ўтойвае: адноўлены раддом — знакавая падзея. Прычым не толькі для магіляўчан. Ён адчыніць свае дзверы таксама і для сельскіх (бліжэйшых да абласнога цэнтра) раёнаў:— Тут будуць рэалізоўваць усе наватарскія дасягненні і ідэі, якія толькі існуюць.
![](/upload/iblock/e88/e88b7ceafb54cebb190f35eddd0d6a2f.jpg)
Новыя тэхналогіі дазволяць прымаць у рэканструяваным раддоме каля трох з паловай тысяч родаў у год. А яшчэ дабавяць магчымасцей для разнастайных відаў родаў. Напрыклад, партнёрскіх. Калі будучая маці аддае прыярытэт вертыкальным родам, яе просьбу таксама задаволяць. Нарадзіць дзіця яна можа нават у вадзе, для чаго будзе ўстаноўлена гідрамасажная ванна.
«Спадзяёмся, што з запускам гарадскога раддома зменшыцца і колькасць маленькіх пацыентаў Рэспубліканскага навукова-практычнага цэнтра «Маці і дзіця», — выказаў надзею Аляксандр Жылін. Ахова мацярынства і дзяцінства ў нашай краіне — прыярытэтны напрамак сацыяльнай палітыкі. Раддом Магілёўскай гарбальніцы хуткай дапамогі трэцім у вобласці перажыў сваё пераўвасабленне. Некалькі гадоў таму значныя перамены закранулі раддамы ў Бабруйску і ў магілёўскай бальніцы № 1. Для маці і нованароджаных тут створаны самыя камфортныя ўмовы: зручныя палаты на два-тры чалавекі, магчымасць з першай хвіліны заставацца разам з немаўлятамі і, вядома, якасныя медпаслугі. Кожны год у Магілёўскай вобласці на свет з’яўляецца каля дзесяці тысяч нованароджаных. Медыкі і ўлады спадзяюцца, што з адкрыццём яшчэ аднаго сучаснага раддома з перадавым абсталяваннем гэтая лічба стане яшчэ большай.
![](/upload/iblock/b7a/b7accc7a811d19e069e4880843c15c3c.jpg)
markova@sb.by