Аладкi, блінцы, налiснiкi — вучымся пячы масленiчныя прысмакі

Масленічны тыдзень у самым разгары. Праводзіць зіму трэба па ўсіх старадаўніх канонах. Гэта значыць, абавязкова з блінамі. Каб успомніць, што такое традыцыйная беларуская кухня, неабавязкова ехаць у вёску. Дастаткова прыйсці на кулінарны майстар-клас. Бліны, блінцы, аладкі, наліснікі ажурныя, у кляры... Педагогі і навучэнцы Мінскага дзяржаўнага прафесійна-тэхнічнага каледжа кулінарыі навучылі карэспандэнта «Р» пячы масленічныя бліны.

Марыя МАКСІМОВІЧ перадае вучням не толькі практычныя веды, але і расказвае аб спрадвечна беларускіх кухарскіх традыцыях

Як чалавеку, для якога звараная ў турцы кава — вяршыня кулінарнага майстэрства, мне дзіўна глядзець на хлопцаў і дзяўчат, якія ўмела варочаюць патэльні на вучэбнай кухні. Пячы будзем адразу некалькі разнавіднасцей бліноў. Пакуль пачынаючыя кухары замешваюць цеста, выкладчык спецдысцыплін каледжа Марыя Максімовіч праводзіць для мяне кароткі кулінарны лікбез:

— Акрамя класічных бліноў з дражджавога цеста, ёсць бліны з прыпёкам. Гатуюцца яны так. На патэльні смажыцца цыбуля з морквай і кавалачкамі сала, затым зверху выліваецца цеста. Начынне як бы ўпякаецца ў цеста. Беларускія бліны адрозніваюцца тым, што пякуцца на кефіры ці сыроватцы з даданнем у якасці разрыхляльніка соды. Бываюць грэцкія і аўсяныя бліны. Пякуцца яны з грэцкай і аўсянай мукі адпаведна. Што тычыцца аладак, дык іх гатуюць з дражджавога цеста. Больш густога, чым для астатніх разнавіднасцей бліноў.

Алеся КАПУСЦІНСКАЯ спрытна малюе на патэльні ажурныя блінцы пад чулым кіраўніцтвам Святланы РАГЕЛЬ

Тым часам цеста ва ўсіх кухараў ужо гатова ператварыцца ў духмяныя бліны. Распаленыя патэльні шыпяць, цеста румяніцца, работа ідзе спарней... П'янлівы водар свежай выпечкі і гарачага травянога чаю напаўняе кухню. Пакуль туды-сюды — стос духмяных блінцоў ужо красуецца на талерцы. Самы час узяцца за прыгатаванне начынак.

— Чым будзе начыняць бліны? — цікаўлюся, прагна пазіраючы на духмяны стос.

Ажурныя блінцы смачна начыняць капустай з вяндлінай і сырам

— Бліны і блінцы — гэта прынцыпова розныя рэчы, — папраўляе мяне выкладчык Святлана Рагель. — Блінцы ў адрозненне ад бліноў пякуцца з вадкага цеста. Іх можна выкарыстоўваць як асобную страву, ужываючы з варэннем ці смятанай. А можна выкарыстоўваць у якасці абалонкі для фаршыравання. Такія блінцы мы называем наліснікамі.

Начынкі для іх самыя розныя. Гэта можа быць каўбаса, вяндліна, сыр, грыбы, шпінат, капуста і іншая гародніна. Каб страва прыгожа глядзелася на стале, блінцы з начыннем можна скласці трохвугольнікамі ці згарнуць у трубачкі. А калі трубачкі яшчэ і нарэзаць кольцамі, то атрымаюцца бліновыя ролы. Таксама блінцы можна абмакнуць у кляры і абсмажыць у фрыцюры.

Бліны-ролы з гароднінай і соусам бешамель у Аляксандра НЕСЦЯРОВІЧА ўдаліся на славу

Кухары 4-га разраду Міхаіл Пастарнакоў і Аляксандр Несцяровіч у традыцыйны беларускі стол унеслі і сучасныя матывы. Прыгатавалі бліновыя ролы з начыннем з гародніны і соусам бешамель, а таксама бліновыя хінкалі з начыннем з курынага паштэту з вяндлінай і грыбным соусам. На дэсерт — аладкі з сырам маскарпоне і фруктовымі макаронамі. Такі пачастунак прыйдзецца даспадобы нават самаму патрабавальнаму госцю.

— Гэта звычайныя аладкі на кефіры з крэмам на аснове сыру маскарпоне. Упрыгожылі страву свежымі ягадамі для павышэння яе вітамінавай каштоўнасці. І фруктовыя макароны, якія жэліравалі з соку з дапамогай агару, — удаецца ў дэталі Міхаіл Пастарнакоў. — На падрыхтоўку чатырох порцый пайшло каля трыццаці хвілін.

На дэсерт — аладкі з сырам маскарпоне і фруктовымі макаронамі.

Тым часам кухар Вера Лукашук частуе нас з фатографам блінцамі з тварагом, а яе калега Надзея Багам’я — дранікамі з хатнімі каўбаскамі. Каштуем — смачна! Спецыяльна для тых, у каго «першы блін заўсёды камяком», Надзея тлумачыць, што рэцэпт просты і пад сілу нават дылетанту на кухні. Трэба змяшаць драную бульбу, муку, соль і спецыі. Дранікі таксама можна гатаваць з тварагом і морквай. Кухар Цімур Авезаў спёк лёгкія класічныя блінцы, якраз для тых, хто любіць смачна паесці і пры гэтым сочыць за фігурай. Змазваць алеем патэльню не трэба. Ва ўмелых руках такія бліны не прыліпаюць і не падгараюць.

Міхаіл ПАСТАРНАКОЎ упрыгожвае аладкі фруктовымі макаронамі.

Побач Алеся Капусцінская спрытна малюе на патэльні ажурныя блінцы. Да мастацтва прыгатавання прысмакаў далучае і мяне.

— Замешваю густое цеста вось такой кансістэнцыі, — Алеся набірае ў лыжку цеста, і яно пачынае павольна сцякаць назад у міску як мёд. — Выліваем цеста ў падрыхтаваную тубу і ўжо з тубы тонкім струменьчыкам на разагрэтую патэльню, малюючы розныя ажурныя ўзоры. Калі бакі блінца пачынаюць адставаць ад патэльні — гэта сігнал, што яго трэба пераварочваць.

Пасля майстар-класа кухары дэгуставалі стравы адзін аднаго

Пасля майстар-класа нас чакала самая прыемная частка — дэгустацыя. Ну а сыходжу з майстар-класа па прыгатванні традыцыйных масленічных прысмакаў са стосам рэцэптаў і блінамі для калег па цэху. Асабліва даспадобы ім прыйшліся бліновыя ролы. Кантэйнер з гасцінцамі спустошылі ўмомант.

gorbatenko_inna@mail.ru