Более 100 тысяч рублей с учебного хозяйства с начала августа получили в Глубокском государственном колледже

Звыш 100 тысяч рублёў са сваёй вучэбнай гаспадаркі за жнівень і пачатак верасня атрымалі ў Глыбоцкім дзяржаўным каледжы

Значна папоўніць бюджэт за кошт сваёй прадукцыі разлічваюць у навучальнай установе на восеньскіх кірмашах, бліжэйшы з якіх будзе на абласных «Дажынках» у Шаркаўшчыне.

Навучэнцы 2-га курса групы трактарыстаў-вадзіцеляў.

У гэтыя дні ідзе актыўная падрыхтоўка да кірмашоў, — уводзіць у курс справы намеснік дырэктара па вучэбна-выхаваўчай рабоце Эла Ждановіч.

— Рыхтуем не толькі гародніну са сваіх палеткаў, але таксама выпечку і адпаведную тэматыцы фотазону. Апошняе для святочнага настрою ўдзельнікаў свята. Асартымент прадукцыі шырокі. Гэта ў першую чаргу жыта, пшаніца, авёс, ячмень, а таксама гародніна: бульба, капуста, морква, буракі, фасоля, гарбузы. Асабліва сёлета ўрадзіла бульба. Цяпер якраз займаемся яе ўборкай. Бяром па 300 цэнтнераў з гектара. На палетках шчыруюць нашы навучэнцы разам з майстрамі вытворчага навучання. Пасля таго як бульба выкапана, прыступаем да яе пераборкі. Выбіраем лепшую, затарваем у сетку. Нельга не адзначыць і той факт, што вялікім попытам карыстаецца наша выпечка: булачкі, піражкі, рулеты, кексы і іншыя прысмакі з рознымі начынкамі, вырабленыя самімі навучэнцамі пад кіраўніцтвам майстроў вытворчага навучання Марыі Арэхва і Надзеі Палідавец. Заўсёды прывозім прадукцыю свежую: вечарам выпекаем, а назаўтра раніцай прадаём. Ніколі не вяртаем дахаты, рэалізуем поўнасцю.

Вучэбная гаспадарка каледжа займае 400 гектараў. Пераважная частка іх адве­дзена пад зерневыя і зернебабовыя: жыта, пшаніцу, авёс, ячмень, сурэпіцу. Знайшлося месца і гародніне: бульбе, моркве, буракам, капусце.
— З вучэбнай гаспадаркі мы жывём, — падкрэслівае дырэктар каледжа Васілій Любоза. — Толькі за зерневыя ўзялі сёлета звыш 100 тысяч рублёў. Атрымалі ў ліпені 7 тон насення сурэпіцы, выручаныя грошы якраз спатрэбіліся на ўборачную кампанію. Урадзілася бульба, якой 5 гектараў. Кожны дае па 300 цэнтнераў. Дзякуй дырэктару ААТ «Кушлікі» Полацкага раёна Фёдару Завацкаму, які забяспечыў насеннем «вега». Клубні не толькі ўраджайныя, але і надта смачныя. Павязём на кірмаш. Цана — ад 50 да 70 капеек за кілаграм. Зерневыя — авёс, ячмень, пшаніца — прыкладна ад 40 да 55 капеек за кілаграм. Мяшок у 40 кілаграмаў — 20 рублёў. Але ж канчаткова ўсё вызначыць рынак.

Атрыманыя грошы ідуць на гаручае, запчасткі. Усяго 20 адзінак тэхнікі, у тым ліку 3 зернеўборачныя камбайны, кормаўборачны, 10 трактароў, 5 грузавых аўтамашын, аўтобус. Толькі каб заправіць поўнасцю бак зернеўборачнага камбайна, давядзецца заплаціць больш за 1500 рублёў.

Купілі на 2 тысячы рублёў лемяхоў, далот для агрэгатаў на пасяўную азімых зерневых. Умацоўваем матэрыяльна-тэхнічную базу: набываем камп'ютары, право­дзім рамонты вучэбных памяшканняў. Ну а цяпер, вядома ж, актыўна рыхтуемся да кірмашоў.

saulich@ bk.ru

Фота прадстаўлена Глыбоцкім дзяржаўным каледжам.