За даллю — Даль
Алег Даль валодаў такiм талентам, што мог бы зрабiць сусветную кар’еру. Але за 20 гадоў працы сыграў усяго ў 29 фiльмах. Пры гэтым нiякiх званняў i прэмiй не атрымаў. Што перашкодзiла? У фiльме «Дрэнны добры чалавек» пляменнiца Алега Даля Таццяна Антанюк раскажа, якiм яе дзядзька быў у жыццi. Таццяна вельмi рэдка дае iнтэрв’ю, аднак для здымачнай групы праекта зрабiла выключэнне.
Таксама (упершыню на тэлебачаннi!) гледачам пакажуць дзённiк артыста, якi ўсе гэтыя гады захоўваецца ў Ларысы Мезенцавай — сяброўкi жонкi Даля Лiзаветы Эйхенбаўм. Некаторыя цытаты апублiкаваны раней, але поўныя запiсы бачылi толькi блiзкiя акцёра. Iнтэрв’ю з Ларысай Мезенцавай, дарэчы, дабiвалiся многiя, яна адмаўляла ўсiм, расказваюць аўтары фiльма «Дрэнны добры чалавек»:
— Але пасля доўгiх угавораў яна ўсё ж пагадзiлася. I мы ўбачылi радкi, у якiх Даль адкрыта расказвае пра кiно, тэатры, сяброў i ворагаў, пра самога сябе... Па ўспамiнах блiзкiх i калег, акцёр заўсёды казаў тое, што думаў. Не iнтрыгаваў, не падладжваўся пад iншых, а калi i спаборнiчаў, то толькi з самiм сабой. I ў нейкi момант надарваўся, не пацягнуў. Не змог скокнуць вышэй…
У здымках фiльма таксама прынялi ўдзел акцёры Генадзь Сайфулiн, Вiктар Тульчынскi i Авангард Лявонцьеў, рэжысёры Iосiф Райхельгаўз i Юрый Грымаў, фатограф Валерый Плотнiкаў, актрыса i публiцыст Элiна Дэлiн.
Першая на Першым
Да дня нараджэння Арыны Шарапавай 29 мая ў 00:35 на АНТ пакажуць дакументальны фiльм «Усмешка для мiльёнаў», прысвечаны вядомай тэлевядучай.Яна нарадзiлася ў Маскве, але дзяцiнства правяла на Блiзкiм Усходзе: бацька Аян Венiямiнавiч быў дыпламатам, а таму Арыне з мамай даводзiлася шмат ездзiць па свеце. У 18 гадоў дзяўчына закахалася i выйшла замуж. Нарадзiўся сын... Але шлюб пратрымаўся зусiм нядоўга, пакiнуўшы ў душы Арыны глыбокую рану — доўгiя гады ў яе не складвалася сямейнае жыццё. Затое дабiлася поспеху ў кар’еры. Скончыла фiлфак МДУ, працавала ў агенцтве друку «Навiны» фотакарэспандэнтам, затым трапiла ў тэлевiзiйны аддзел. Там яе заўважылi i запрасiлi ва УДТРК весцi праграму «Час». А потым былi Першы расiйскi канал (тады — АРТ) i праца ў iнфармацыйнай праграме «Час»…
У фiльме «Усмешка для мiльёнаў» Арына Шарапава адкрыта раскажа пра свае ўзлёты i падзеннi, пазнаёмiць гледачоў з цяперашнiм мужам Эдуардам Карташовым, унукамi i сынам Данiiлам. Цёплыя словы пра вядучую таксама скажуць мадэльер Вячаслаў Зайцаў, калега Алена Малышава, кароль поп-эстрады Фiлiп Кiркораў i народная артыстка Расii Ларыса Долiна.
Рэдкая птушка
У 12 гадоў у дуэце з мамай Алай Пугачовай Крысцiна Арбакайтэ выканала песню «А ведаеш, усё яшчэ будзе», якая iмгненна стала хiтом. I шмат гадоў пасля Крысцiне кожны дзень даводзiлася даказваць усiм i сабе самой: яна не проста дачка «Жанчыны, якая спявае», а арыгiнальная, самабытная актрыса i спявачка, самастойная i самадастатковая асоба.«Пачынаць сваю кар’еру з хiта — гэта рэдкае шчасце», — казала Ала Пугачова. Такiм хiтом для Крысцiны Арбакайтэ стала песня «Пагаворым», якую яна запiсала разам з Iгарам Нiкалаевым, прычым употай ад мацi. Ну а далей — канцэрты, гастролi, здымкi ў кiно i праца ў вядучых тэатрах Расii, запiсы альбомаў i хiт адзiн за адным…
З дакументальнай стужкi «А ведаеш, усё яшчэ будзе...» гледачы даведаюцца, як стваралiся лепшыя музычныя работы Крысцiны Арбакайтэ, пабываюць разам з ёй у тэатры, дзе яна iграе ў спектаклi «Двое на арэлях». У лiку эксклюзiўных — кадры са здымак клiпа «Пералётная птушка», у якiм прыняў удзел экс-муж спявачкi Уладзiмiр Праснякоў.
