За 18 гадоў існавання Міжнародны фестываль праваслаўных песнапенняў “Каложскі Благавест” стаў не толькі візітнай карткай Гродзеншчыны, аб ім ведаюць далёка за межамі Беларусі. Яго арганізатары, удзельнікі і госці заўважаюць — “Каложскі Благавест” дапамагае ва ўмовах сучаснасці захоўваць традыцыю спеваў і павышаць узровень духоўнасці грамадства. У сёлетнім фестывалі прымуць удзел царкоўна-парафіяльныя і свецкія харавыя калектывы з Беларусі, Расіі, Украіны, Польшчы, Літвы, Латвіі, Сербіі і Румыніі.
Афіцыйнае адкрыццё свята запланавана на 20 лютага. Але мерапрыемствы, прымеркаваныя да яго, пачнуцца на некалькі дзён раней. У нядзелю 17 лютага выступіць фолк-гурт “Рада”. У панядзелак адбудзецца прагляд і абмеркаванне дакументальнага фільма мітрапаліта Іларыёна “Праваслаўе ў Японіі”. У аўторак адкрыецца выстава “Заўсёды радуйцеся!”, прысвечаная хрысціянскім святам, а таксама адбудзецца вечар духоўнай паэзіі і аўтарскай песні. Конкурсныя праслухоўванні запланаваны на 21— 22 лютага. У гэтыя дні таксама пройдуць канцэрты харавых калектываў з розных краін. Ацэньваць канкурсантаў будзе міжнароднае журы на чале з клірыкам гродзенскага Свята-Пакроўскага кафедральнага сабора, членам Беларускага саюза кампазітараў, лаўрэатам Дзяржаўнай прэміі Беларусі, лаўрэатам прэміі “За духоўнае адраджэнне” протаіерэем Андрэем Бандарэнкам. Цырымонія ўзнагароджвання пераможцаў адбудзецца ў дзень закрыцця свята 23 лютага.
Фото pokrovgrodno.org
