Нарыхтоўка i продаж перад Спасам: як сёлета ідуць справы з фруктамi

Заўтра праваслаўныя вернікі адзначаць Яблычны Спас. Яблыкі ўсіх гатункаў, памераў і афарбовак — пакупныя ды свае — людзi прынясуць у храмы, каб асвяціць. Дарэчы, не першы дзень яны нясуць яблыкі ў нарыхтоўчыя пункты. Гавораць, што ў гэтым годзе вельмі вялікі ўраджай. Карэспандэнт «Р» даведалася аб падрабязнасцях.
Ужо зараз Белкаапсаюзам практычна ў тры разы больш закуплена яблыкаў, чым у мінулым годзе! Па стане на мінулы чацвер ужо звыш 16 тысяч тон, у тым ліку ад насельніцтва — 15,1 тысячы тон. Гатовы забраць вашы яблычкі аж у 750 прыёманарыхтоўчых пунктах па ўсёй краіне, звыш чым у 5 тысячах крам, размешчаных у сельскай мясцовасці.

— У гэтым годзе арганізавана работа каля 950 штатных нарыхтоўшчыкаў, таксама прымаюцца на працу пазаштатныя, — у падрабязнасці прысвяціў Юрый Сакалоўскі, намеснік начальніка ўпраўлення нарыхтовак Белкаапсаюза. — Кожнае райспажыўтаварыства арганізуе дзейнасць у сярэднім ад 3 да 10 сезонных прыёманарыхтоўчых пунктаў: стацыянарных і на даму. Задзейнічаны і транспарт нашых арганізацый — усяго больш за 600 адзінак.

Свежыя яблычкі таварнага гатунку нарыхтоўваюць, каб потым рэалізаваць у гандлёвых сетках, на рынках, кірмашах і ў грамадскім харчаванні спажывецкай кааперацыі. Вядома ж, закладуць гэтыя вітаміны і ў стабілізацыйныя фонды ды адправяць iх на экспарт. Што тычыцца яблыкаў, якія называюць «апад», то іх адгрузяць на прамысловую перапрацоўку на прадпрыемствы. А што ж па цане?

— Закупачныя цэны на таварныя яблыкі — ад 20 да 60 капеек за кiлаграм, на яблыкі-апад — ад 3 да 5 капеек, — знаёміць з прэйскурантам Юрый Сакалоўскі і дадае:   — Закупачныя цэны на яблыкі для прамысловай перапрацоўкі фарміруюцца зыходзячы з прыёмных цэн перапрацоўчых прадпрыемстваў.

А як ідзе продаж на рынку? Вось пенсіянер Віктар Мікалаевіч хоча хоць нейкую капейку зарабіць — у гэтым годзе ў яго яблынькі на ўчастку пад Мiнскам занадта ўрадзілі, таму пайшоў на рынак:

— Столькі сам не з'ясі. У гэтым годзе, людзi кажуць, найвялікшы ўраджай. У мяне вунь антонаўка ўжо зламала сабе дзве вялікія галіны ад колькасці пладоў.

У асноўным на прылаўках ляжаць гатункі «белы наліў» і «малінаўка» — раннія яблычкі. Каштуюць па 2—2,5 рубля за кiлаграм, увечары — 1 рубель.

У нядзелю па ўсёй краiне праваслаўныя вернікі пойдуць у свае храмы на службу, асвячаць яблычкі. У Гомелі наогул правядуць свята пад адкрытым небам ля скульптурнай кампазіцыі з велізарных бетонных яблыкаў. Прысвечанае Яблычнаму Спасу свята пройдзе і ў аграгарадку Бабічы Чачэрскага раёна, у аграгарадку Астроўшчына Полацкага раёна — абрадавае дзеянне «Астроўшчынскія заветкі ў Яблычны Спас» ды ў другіх гарадах і вёсках.

У гэтае свята, якое ў народзе назвалі Яблычным Спасам, галоўнае — не яблыкі. Яны толькі прыемны, традыцыйны, смачны і вітамінавы дадатак.