Часопіс Forbes апублікаваў чарговы рэйтынг самых высокааплатных знакамітых асоб. На гэты раз яго ўзначаліла амерыканская мадэль, бізнесвумен, свецкая і медыйная асоба Кайлі Джэнер. Да здзіўлення многіх, Кайлі ўсяго 22. Летась ва ўзросце 21 года яна стала самым маладым мільярдэрам у гісторыі, тым самым пабіўшы рэкорд Марка Цукерберга. Вядома, што сваю мадэльную кар’еру Кайлі пачала яшчэ падлеткам — у 2010 годзе. А ў канцы 2015-га стварыла ўласную лінію касметыкі Kylie Cosmetics. За мінулы год даходы Джэнер склалі 590 мільёнаў долараў. Большасць з іх зорка зарабіла, прадаўшы частку кампаніі Kylie Cosmetics.
Другое месца ў спісе заняў 42-гадовы амерыканскі выканаўца хіп-хопа, рэпер, прадзюсар, кампазітар і дызайнер Канье Уэст. Ён зарабіў 170 мільёнаў долараў, большая частка з якіх прыйшлася на даходы ад брэнда красовак Yeezy.
У дзясятку самых высокааплатных знакамітых асоб трапілі таксама швейцарскі тэнісіст Роджэр Федэрэр (106 мільёнаў долараў), футбалісты Крышціяну Раналду (105 мільёнаў), Ліянэль Месі (104 мільёны) і Неймар (96 мільёнаў), амерыканскі баскетбаліст Леброн Джэймс (88 мільёнаў), а таксама акцёры Тайлер Пэры (97 мільёнаў) і Дуэйн Джонсан (87 мільёнаў) і тэлевядучы Говард Стэрн (90 мільёнаў).
mila@sb.by
