«Званы Сафіі» соберут аматоров органной музыки

07.11.2021 07:12:00

Міжнародны фестываль арганнай музыкі «Званы Сафіі» лічыцца адным з самых яркіх музычных праектаў у краіне. За яго шматгадовую гісторыю, а ўпершыню ён прайшоў у Полацку ў 1996 годзе, удзельнікамі фестывалю станавіліся майстры арганнага мастацтва з 23 краін — Аўстрыі, Германіі, Польшчы, Швейцарыі, Японіі і многіх іншых. З-за пандэміі і закрытых межаў яго геаграфія вымушана звузілася. Аднак арганізатары праекта робяць усё магчымае, каб слухачы змаглі адчуць прыгажосць і глыбіню арганнай музыкі.

Сёлета фестываль «Званы Сафіі» пройдзе з 7 па 28 лістапада. Уверцюрай да форуму стане выступленне ўжо ў гэту нядзелю канцэртнага дуэта з Санкт-Пецярбурга — лаўрэата міжнародных конкурсаў Кацярыны Марышкінай (арган) і заслужанага артыста Расіі Марка Таўбе (скрыпка). У іх выкананні прагучаць сачыненні кампазітараў XVIII—XX стагоддзяў, а таксама фантазіі на тэмы вядомых опер.

Праз тыдзень, 14 лістапада, адбудзецца ўрачыстае адкрыццё фестывалю. Перад гасцямі выступяць натхняльнік форуму, арганістка Сафійскага сабора, заслужаная артыстка Беларусі Ксенія Пагарэлая і камерны аркестр «Еўропа-Цэнтр», якія падрыхтавалі асаблівую праграму да 250-годдзя з дня смерці чэшскага кампазітара Францішака Брыксі.

Не пакіне абыякавымі аматараў арганнай музыкі і канцэрт лаўрэата міжнародных конкурсаў Кацярыны Нікалаевай, які адбудзецца 21 лістапада. У праграме сачыненні І. С. Баха, Л. В’ерна і М. Дзюруфле. Завершыць фестываль 28 лістапада музыка І. С. Баха, С. Танеева, Т. Бубека і А. Шмітава. Выканае іх творы зорны дуэт у складзе арганіста, кампазітара, лаўрэата міжнароднага конкурсу Аляксея Шмітава і ўладальніцы цудоўнага голасу, заслужанай артысткі Расіі, народнай артысткі Абхазіі, салісткі Музычнага тэатра «Гелікон-опера» Алісы Гіцба.

mila@sb.by

Фото БЕЛТА