Как готовится к 80-летнему юбилею Национальный художественный музей

Нацыянальны мастацкі музей пачынае юбілейныя мерапрыемствы з нагоды свайго 80-годдзя. Першыя з іх адбудуцца 24 студзеня. Менавіта ў гэты дзень у 1939 годзе пачалася яго афіцыйная гісторыя — згодна з пастановай Савета народных камісараў БССР у Мінску была створана Дзяржаўная карцінная галерэя. Яна размяшчалася на вуліцы Карла Маркса, 29. Дарэчы, у будынку на вуліцы Леніна, 20 Нацыянальны мастацкі музей знаходзіцца з 1957 года. Сёння гэта найбуйнейшы ў краіне збор беларускага і замежнага мастацтва. У экспазіцыі, філіялах і фондасховішчах знаходзіцца больш за трыццаць тысяч твораў. Юбілейны дзень нараджэння музей сустракае з уласным гімнам. Аўтарам урачыстага твора сталі кампазітар Аліна Безенсон і паэт Аліна Легастаева. А права першага выканання даверана Канцэртнаму хору Мінскага дзяржаўнага музычнага каледжа імя М. Глінкі.

Але гэта яшчэ не ўсе сюрпрызы, пра якія расказаў дырэктар Нацыянальнага мастацкага музея Уладзімір Пракапцоў:

— У дадатак да гімна ў музея з’явіцца і свой штандар. У гонар юбілею 24 студзеня на будынку па вуліцы Карла Маркса, 29 будзе ўрачыста адкрыта памятная дошка. На экран тэлеканала «Беларусь 3» выходзіць новы 8-серыйны дакументальны фільм «Дом, дзе жыве мастацтва». Кожная серыя прысвечана 10-годдзю дзейнасці музея. Акрамя таго, рыхтуецца прэзентацыя салодкай прадукцыі, спецыяльна выпушчанай да юбілею фабрыкай «Камунарка». Гэта — шакалад з выглядам будынка музея, каробка цукерак, упрыгожаная выявай твора Івана Хруцкага «Партрэт незнаёмкі» і набор шакаладу «Слуцкія паясы». Так што ў дзень нараджэння музея можна будзе адчуць не толькі духоўную асалоду ад сустрэчы з яго калекцыяй, але і смак натуральнага шакаладу.

Асноўныя юбілейныя ўрачыстасці пройдуць у лістападзе. Але на працягу ўсяго года ў музеі запланавана шмат розных мерапрыемстваў, у тым ліку міжнародная канферэнцыя рэстаўратараў і доўгачаканае адкрыццё новага будынка ў «музейным квартале».

Серыю мастацкіх праектаў ужо 25 студзеня пачнуць дзве выставы. Першая — «Маляўнічыя мелодыі» — прымеркавана да 100-гадовых юбілеяў дзвюх мастачак — Раісы Кудрэвіч і Ва­ляр’­я­ны Жоўтак. Другая — «Адкрыццё сучаснасці» — прадэманструе вынікі кар­пат­-лі­вай 5-гадовай працы музейных рэстаўратараў і пазнаёміць больш чым з 70 прадметамі мастацтва на розных этапах работ, пачынаючы ад навуковых даследаванняў помнікаў, працэсу іх аднаўлення і стану пасля завяршэння рэстаўрацыі.

svirko@sb.by